Rag lies y’n gemeneth a Gernewegoryon, an ughpoynt yn mysk hwarvosow an yeth restrys dres an vledhen yw an Bennseythen Gernewek, hag yw synsys y’n Gwenton a-dro dhe Bask. An re ma re beu synsys a-dhia 1975 ha poynt-fogella yns i rag dyskoryon.
Amkan an Bennseythen Gernewek yw ri dhe gernewegoryon ha dyskoryon chons dhe braktisya kewsel, goslowes ha skrifa an yeth yn unn omlowenhe hag yn kerghynnedh hegar, lowsys ha kosel, ha ni a wayt ni dhe wul henna yn sewen – prag na dhewgh dhe’n nessa Pennseythen ha gweles mars yw henna an kas?
An bennseythen o kemmysk bryntin a dhyski, delit ha junyans, my a gara pub eylen! Ny allav talvos an hwarvos ma re ughel; marthys o. An unnsel poynt isel yw gortos bledhen bys y’n nessa!
Attendyas kynsa tro, 2025
Lamma orth:
Yn 2026 feusik on ni dhe allos synsi Pennseythen Gernewek 2026 yn Skol Ughel Mowysi Truru (Falmouth Rd, TR1 2HU), yn benncita Kernow, Truru. An hwarvos a vydh a’n 17ves-19ves a vis Ebrel. Tagg an hwarvos yw #pennseythen26
Y fedhons ow restra stalla lyvrow dres an hwarvos.
Dy’Gwener yw dydh leun a dhyskansow rag seul a vynn gul apposyans an vledhen ma, po seul a vynn kennertha aga dyski. Klassys yw rynnys yn gradhow hag yma esedhogow Tregedna (yn Kernewek yn tien) rag an re a gowlwrug aga apposyansow po gans nebes frethter y’n yeth. Ynwedh, an dy’Gwener yma’n kynsa dydh a’n kors diwysyk rag dallethoryon flamm nowydh.
Y fydh kevres a fylmys berr yn Kernewek diskwedhys gorthugher dy’Gwener. Y fydh spys rag kemyska hag omnowedhi gans kowetha goth ha dos erbynn kowetha nowydh, ha martesen kana warbarth.
Rag dyskoryon, myttinweyth yma dewis a dhyskansow y’n gis hengovek rynnys yntra nivelyow isella hag ughella, po hweljiow hag yw gwiw rag pub nivel a Gernewek oll. Rag an bobel gans nivel ughella a frethter y fydh ynwedh towlen arethyow yn Kernewek. An nessa dydh a’n kors diwysyk rag dallethoryon a vydh ow hwarvos an dy’Sadorn.
Androweyth, y fydh dewis a hweljiow ha kerdh gidys a vydh gwiw rag pub nivel a Gernewek oll. Ynwedh y fydh esedhek ow tochya methodys adhyski wosa an hweljiow.
Y’n gorthugher dy’Sadorn y fydh dhyn ilow a Richard Trethewey hag Anna Anise. Y fydh ynwedh chons dhe glappya ha kemyska.
Yma gonis eglos berr, ygor dhe bubonan, kyns dyskansow hag esedhogow dhe dhalleth.
Dy’Sul vyttin yma dewis a dhyskansow y’n gis hengovek rynnys yntra nivelyow isella hag ughella, po hweljiow hag yw gwiw rag pub nivel a Gernewek oll. Rag an bobel gans nivel ughella a frethter y fydh ynwedh towlen arethyow yn Kernewek.
Wosa kon, diskwedhyans an Bennseythen a vydh chons rag tus dhe gevrenna taklow a wrussons i dres an bennseythen po kyns: bardhonieth, skrifa, skechys berr, ilow, h.e. Mar pleg, gwrewgh kestava orthyn mars eus neppyth a vynnowgh kevrenna y’n diskwedhyans.
Y fydh te ha koffi kavadow rag tus dhe omservya dres an bennseythen—mar pleg gwrewgh dri kruskyn dasusadow genowgh hwi.
Y fedhyn ni ow restra barr y’n hel gorthugher dy’Gwener ha Sadorn ow kwertha diwosow gans ha heb las.
Mar kwrer dewis metherieth, y fydh Skol Ughel Truru ow provia livyow skav dy’Gwener ha Sadorn ha kon rostys dy’Sul. Ynwedh y fedhons i ow provia kinnyow dew sand dy’Gwener ha Sadorn. Boos a vydh servys yn bewdern an skol hag ytho y hyllyn ni pesya yn ayrgylgh troghyansek an bennseythen, ow kallosegi attendysi dhe glappya dres boos kevrynnys, gul kolmow nowydh ha praktisya aga devnydh socyal a’n yeth.
Yma park kerri orth an tyller heb kost dres an bennseythen. Yma an gorsav tren 20myn yn kerdh hag an gorsav kyttrinyow 12myn yn kerdh.
Yma lies ostel ha G&H ogas dhe Skol Ughel Truru. Y hyllir gweles nebes profyansow omma.
Toknys 2026 yw kavadow lemmyn.
