‘An Rin Kernewek ha Hwedhlow Erel’
Gans Agatha Christie, treylys gans Roger Henley
Kowethas an Yeth Kernewek yw lowen a warnya dyllans treylyans nowydh a hwegh drolla berr gans awtoures lien galweyth a vri, Agatha Christie.
An hwegh hwedhel berr oll ma a rann mell dhe Gernow, kynth yw an mell na nebes tanow yn unn po dew hwedhel. An drollow a gomprehend: An Rin Kernewek (The Cornish Mystery); An Gowethes (The Companion); An Hond a Ankow (The Hound of Death); An Kons Gosek (The Blood-Stained Pavement); Kas an Venyn Rych (The Case of the Rich Woman); Yngotys a Owr (Ingots of Gold).
Yth yns i an kynsa treylyans a hwedhlow Agatha Christie yn Kernewek ha’n pympes ha tri ugens yeth may feu hy hwedhlow treylyes ynni.
“Ass on ni prout a dhyllo an hwedhlow ma rag an kynsa tro yn Kernewek,” yn-medh Lianne Wilson, chayr panel dyllo Kowethas an Yeth Kernewek. “Nyns yw kevrin bos arenebedhow Kernow ha Dewnens posek yn skrifa Agatha Christie, ha wortiwedh an termyn re dheuth rag nebes a’s drollow dhe vos kavadow yn Kernewek.”
Yn terowel a-dhyworth Torquay yn Dewnens, yth yw Agatha Christie styryes avel myghternes lien galweyth wosa hi dhe skrifa 75 lyver dres hy bewnans. Kernow a brovias awen rag lies tyller ha hwarvos yn meur a’y drollow, ow komprehendya drolla titel an kuntel ma ‘An Rin Kernewek’.
Dyllys yn terowel yn 1923, ‘An Rin Kernewek’ yw onan a dhrollow a-varr an helerghyas belgek fugiethel a vri, Hercule Poirot. Y’n hwedhel ma, Monsieur Poirot yw govynnys dhe hwithra kas a bosnans y’n drev vyghan fug a Bolgarwith yn Kernow.
Roger Henley yw Bardh a Orsedh Kernow ha dyskador a’n yeth gans KDL. Y hwedhlow berr ha’y vewskrifow re waynyas lies pewas y’n kesstrifow an Orsedh y’n bledhynnyow usi passyes.
Gwaytys yw an drollow dhe brevi dhe les dhe studhyoryon keffrys ha’n re a gar novelys galweyth, mes yn sur i a elow dhe bub eghen a redyer Kernewek. Skrifys yw an treylyans ma y’n Furv Skrifys Savonek hag yth yw gwiw rag studhyoryon tressa gradh po moy.
Kavadow yw ‘An Rin Kernewek’ yn agan gwerthji hag yn Kowsva dhe Gresdir.