Yma arghanserethow CIO Kowethas an Yeth Kernewek ow pesya yn studh da.
Degemeryansow rag 2024-25 o £163 mil, kressys dhyworth £116 mil warlena. Kyns oll, gwerthasow lyver a gressyas dhyworth £21m dhe £24m, feow-eseleth Kowethas dhyworth £6m dhe £8m, kemeryansow an Bennseythen dhyworth £3.5m dhe £5.2m hag oker degemerys dhyworth £0.7m dhe £2.4m. Ni a gavas grontys a £97m hevlena – Rosweyth a gavas grontys byghan dhyworth Boardmasters (£1m) ha Konsel Kernow (£6m) ha Kowethas a dhegemeras sommen vras (ogas ha £90m) rag an ragdres teyr bledhen ‘REVIVE’. Argevrohow ha ‘Gift Aid’ a besyas provia gober posek.
Yn kettermyn, talasow o £80m, le ages £88m warlena. Hemm o, yn rann, drefen bos degys gwerthji Kowethas, Kowsva, a gostyas £7.5m warlena, ha gans gwithva sempel yn y le hevlena, £3m o an kost. Nyns esa feow kussulyans hevlena ha’n gendon istorek dhe Gesva a veu peys yn tien warlena.
Drefen bos degemeryansow ughella ha talasow isella, yth esa gwayn a £83m yn 2024-25, yn le £28m yn 2023-24.
Drefen hemma, yth esa £162m y’n arghantti an 31ves mis Hedra 2025.
An finwethow rag arghantti y’n RU o £85m, ytho, hemm yw rynnys yntra dew arghantti. Yma Lloyds ow synsi akont kesresek hag akont erbysyon desempis (kepar ha kyns) ha Cambridge and Counties ow synsi akont erbysyon gwarnyans gans kevradh oker ughella.
Kowethas an Yeth Kernewek a dhyght arghanserethow rag Kowethas an Yeth Kernewek ha menystra arghanserethow rag Rosweyth, an rosweyth a gowethyansow Kernewek. Keffrys, Kowethas an Yeth Kernewek yw kespar yn ragdres teyr bledhen henwys REVIVE, a dhallathas mis Meurth 2025. Hemm yw arghasys gans EU Horizon a brovias ragtal meur a £90m rag oberyansow an ragdres. Gasadow REVIVE a sevis orth £81m an 31ves mis Hedra 2025 mes, notyewgh, an arghasow ma a worta kerth an UE bys yn an talas finek (gwaytys yn 2028). Rosweyth a synsis pythow ylyn a £42m ha’n Kowethas a synsis pythow ylyn a £42m an 31ves mis Hedra 2025.