Wosa agan dastyllans a Hwedhlow a-dhiworth an Orsedh warlena, mall yw gans an Kowethas diskwedhes moy a ober awenek yn Kernewek. Yth eson ni ow medras orth kuntellyver nowydh gans dalgh nowydh, skrifys genes jy.
Yth eson ni ow hwilas yeth plen po bardhonieth yn Kernewek ow tochya onan a’n themys ma:
- Skat dhe Skommow (Smashed to Splinters)
- Pols Gwander (A Moment of Weakness)
- Mires war Dhelergh (Looking Back)
- Ryb an Avon (By the River)
- Hanternos (Midnight)
Ni a gennerth entrysi dhe brederi dres an assayys-ha-prevys ha dhe dhastewynnya taves hag yw splann ha bew, hag yw moy es afinans rag kisten joklet.
Fatel Entrir
Rag entra, gwra danvon ober avel .docx, .odt po PDF avel stagell orth [email protected] gans linen an desten “Kesstrif Skrifa 26”. Mar pleg, deriv dhyn py huni yw thema dha ober mar nyns yw titel an ober.
An linen varow yw hanternos an 17ves Me 2026. Govenek a’gan beus kedhla gwaynoryon yn Metheven a-varr.
Manylyon
Y kodh bos profyansow strothys orth 2,000 ger rag yeth plen ha 50 linen rag bardhonieth. Nyns eson ow hwilas treylyansow po fakt y’n eur ma.
Wolkom yw profyansow orth pub nivel a frethter. Y hyll bos hwedhel da skrifys gans gramasek es hag y karsen ni klewes a skriforyon nowydh.
Y fydh profyansow breusys heb hanow gans an Isvagas Dyllansow war aga merit awenek ha war aga gis ha devnydh sley aga Hernewek. Le posek yw dhyn treylyansow fyllys ha poyntyans perfeyth ages dell yw gul dhe’n yeth bewa war an folen.
Profyansow yw degemerys yn pub orgraf hag eghen a Gernewek hag y fynnyn gweles an diverseth a Gernewek komprehendys y’n lyver finek. Y hwren ni oberi gans entrysi sewen war ewnheansow yw res rag aga ober.
Res yw bos profyansow andhyllys marnas pan vons dyllys kyns yn An Gannas, war wiasvaow personek po war vedia socyal hepken.
Res yw bos profyansow dha ober dha honan ha ny wren degemeres ober gweresys gans AI po dinythys ganso. Y tegemeryn ober gwrys dre gesoberi. Profyansow liesek ha kettermynek yw amyttys.
An pewas yw bos dyllys y’n lyver gorfennys, hag ynwedh kopi fisegel a’n lyver pryntys.Y pes bos gwirpryntyans gans an skrifer, mes y fydh dhyn an gwir aneksludus a dhyllo an ober yn furv prynt, bysyel ha son.