Derivas gans Lianne Wilson, Sodhek Dyllansow.
An isvagas a-lemmyn yw my ow honan (trester, kaderyer), Davyth Fear, Emma Jenkin, Loveday Jenkin, Robin McCarthy ha Sam Ruane-Brown. My a garsa godhvos gras dhedha yn personek a’ga ober kales.
Ygor yw an Isvagas dhe seul gans bern yn avonsya an ober a wren, yn arbennik an re gans sleythnethow po skians yn dyllo. Ni a vet yn misyek, ogatti, gorthugher dy’Sul.
Dyllansow an Vledhen ma
- Gwedrow-Mires (bardhonieth diwyethek) – 34 gwerthy
- Gwari Ger Kernewek (gwariow ger) – 38 gwerthys
- Dres an Vledhen hag An Teylu Banalek (lyver gradhys/ober) – 50 gwerthys
- Dons Men (bardhonieth teyryethek) – dyllans nowydh
Dastyllansow an Vledhen ma
- Hwedhlow a-dhiworth an Orsedh (hwedhlow berr ha feth) – dyllans nowydh
Gwerthow
Derivasow Du 2024-Hedra 2025 a dhiskwedhas gwerthow lyvrow owth ynkressya 18%, gans kostys ow lehe a £20k dhe £12k. Dre vras hemm yw drefen ni dhe vovya orth Prynt war Worholeth, dre Lulu, owth hedhi kynskostys pryntya ha gans edhom a le a spas.
Kesordener an Kowethas re drovyas bos an system Prynt war Worholeth pur effeythus ha es dhe usya, keffrys ha degemerys yn es gans agan prenoryon. Pella, hemma a as dhyn dyllo lyvrow heb ania yn kever gwertha meur anedha. Y fedhyn ni ow mires orth fordhow dhe weythresa an les ma y’n devedhek, ow moghhe pella an diversedh a lyvrow gwerthys.
Gwerthow lyvrow yw rynnys yn ta, gans gwerthow Kowsva Dardhek tamm moy es gwerthow der agan gwiasva. Agan dyllansow agan honan a bes bos an gwella yn talvosogeth ragon, gans Broder Wella (dyllys 2024) an moyha meurgerys. Ni a vynn dyllo Broder Wella A dhe Gembra y’n vledhen a dheu.
Ragdresow a-Lemmyn
An vledhen a dheu a wra gweles dyllans an titlow a sew:
- Gwenili hag Amazones (Swallows and Amazons), Arthur Ransome, tr. Davyth Fear
- Kernow ha’y Breselyow Ystorek (Kernow and its Historic Wars), 2a dyl., Rod Lyon
- Lyver gradhys nowydh rag dallethoryon
- Kuntellyver nowydh a vardhonieth ha yeth plen
Mar mynnydh dyllo dha ober dha honan, gwreydhyel po treylyans, dredhon, mar pleg gwra danvon ebost orthyn.
Gwiasva hag Asnodhow Bonus
Agan folen Lyvrow nowedhys a dhiskwedh agan dyllansow a-gynsow, istori dyll hag asnodhow bonus, kepar ha son, gwydhyow ha folennow aktivitys rag dyskoryon. Agan rekordyansow son yw kavadow ynwedh war bub leuren bras kodhkastys.
Kesstrif Skrifa
Mall yw gans an Kowethas diskwedhes moy a ober awenek yn Kernewek. Yth eson ni ow medras orth kuntellyver nowydh gans dalgh skrifys genes jy. Yth eson ni ow hwilas yeth plen po bardhonieth yn pub orgraf hag orth pub nivel frethter ow tochya onan a’n themys ma:
- Skat dhe Skommow (Smashed to Splinters)
- Pols Gwander (A Moment of Weakness)
- Mires war Dhelergh (Looking Back)
- Ryb an Avon (By the River)
- Hanternos (Midnight)
Rag moy a vanylyon, y’ga mysk niver a eryow ha fatel entrir, mir orth an gwarnyans war agan gwiasva. An linen varow yw hanternos an 17ves Me 2026.